Weckherlin Georg Rodolf

An das Teutschland
Sonnet

Zerbrich das schwere Joch / darunder du gebunden /
O Teutschland / wach doch auff / faß wider einen muht /
Gebrauch dein altes hertz / vnd widersteh der wuht /
Die dich / vnd die freyheit durch dich selbs überwunden.

Straf nu die Tyranney / die dich schier gar geschunden /
Vnd lösch doch endlich auß die (dich verzöhrend) glut /
Nicht mit dein eignem schwaiß / sondern dem bösen blut
Fliessend auß deiner feind vnd falschen brüdern wunden.

Verlassend dich auf Got / folg denen Fürsten nach /
Die sein gerechte hand will (so du wilt) bewahren /
Zu der Getrewen trost / zu der trewlosen raach:

So laß nu alle forcht / vnd nicht die zeit hinfahren /
Vnd Got wirt aller welt / daß nichts dan schand vnd schmach
Des feinds meynayd vnd stoltz gezeuget / offenbahren.