Heinrich von Morungen

Ich bin keiser âne krône

Ich bin keiser âne krône
sunder lant. daz meine ich an den muot:
dern gestuont mir nie sô schône.
wol ir lîbe, diu mir sanfte tuot.
daz schaffet mir ein frowe fruot.
dur die sô wil ich stête sîn,
wan in gesach nie wîp sô rehte guot.

"Gerne sol ein riter zîen
sich ze guoten wîben: dêst mîn rât.
bœsiu wîp diu sol man flîen:
er ist tump swer sich an sie verlât;
wan sin geben niht hôen muot.
iedoch sô weiz ich einen man,
den ouch die selben frowen dunken guot.

Mirst daz herze worden swêre.
Sêt, daz schaffet mir ein sendiu nôt.
Ich bin worden dem unmêre
der mir dicke sînen dienest bôt.
Wê war umbe tuot er daz?
Und will er sichs erlouben niht,
sô muoz ich im von schulden sîn gehaz."