Hebel Johann Peter

Wächterruf

Looset, was i euch will sage!
D'Glocke het zehni gschlage.
 Jetz betet und jez göhnt ins Bett,
 und wer e rueihig Gwisse het,
 schloof sanft un wohl! Im Himmel wacht
 e haiter Aug die ganzi Nacht.

Looset, was i euch will sage!
D'Glocke het ölfi gschlage.
 Un wer no an der Arbet schwitzt,
 un wer no bi der Charte sitzt,
 dem biet i jetz zuem letschtemool -
 's isch hochi Zyt -, un schloofet wohl!

Looset, was i euch will sage!
D'Glocke het zwölfi gschlage.
 un wo no in der Mitternacht
 e Gmüet in Schmerz und Chummer wacht,
 se geb der Gott e rueihige Stund,
 un mach di wieder froh un gsund!

Looset, was i euch will sage!
D'Glocke het ais gschlage.
 Un wo mit Satans Ghaiß und Root
 e Dieb uf dunkle Pfade goht,
 - i will's nit hoffen, aber gschiht's -
 gang haim! Der himmlisch Richter siht's.

Looset, was i euch will sage!
D'Glocke het zwai gschlage.
 Un wem scho wieder, eb's no tagt,
 die schweri Sorg am Herzen nagt,
 du arme Tropf, dy Schlof isch hi!
 Gott sorgt! Es wär nit nötig gsi.

Looset, was i euch will sage!
D'Glocke het drei gschlage.
 Die Morgestund am Himmel schwebt;
 un wer im Friede der Tag erlebt,
 dank Gott und faß e frohe Muet,
 un gang ans Gschäft, un - halt di guet!